رسالة للمصرية للاتصالات .. متخلوش الفشل يبقى عنوانكم

ايجى 2030 /

تركت الشركة المصرية للاتصالات جميع المشكلات التي تواجه العملاء وخصوصا مشكلات الانترنت ” تى اى داتا ” واتجهت للاهتمام بالفانتازيا والبروبجاندا” وأصبحت ليس لديها حل لمشاكل الإنترنت في مصر حيث أننا أمام إدارة شركة تدير أمورها بالكذب والتضليل للمجتمع والناس .

منذ 16/5/2016   حصلت مشكلة فى الانترنت الذى أصبح جزء كبير من حياتنا فصلت الخدمة نهائى عن البيت  وتم الاتصال بالدعم الفنى لشركة “تى اى داتا” رد المسئول عن الخدمات وقال سوف يصلك مندوبنا بعد أربع أيام عمل الاتصال كان يوم الاربعاء خد عندك الجمعة والسبت اجازة ياعنى هيوصلوا لك يوم الثلاثاء القادم دخلنا فى أسبوع والله لوكان جاى من السعودية عن طريق البر كان وصل .

المهم جانى بعد اسبوع الدعم الفنى دخل البيت وخرج من البيت ورجع البيت وقال المشكلة اتحلت وفعلا الخط اشتغل يادوب وصل نهاية الشارع ورجعت المشكلة وفصل النت ـ الله يخرب بيت النت ـ المهم .

اتصلت تانى مرة أخرى وقال نفس الكلام وزاد على المشكلة مشكلة تانية ـ ليست من خاصيتى ـ قال ان السنترال فية مشكلة وأعطانى رقم الشكوى ( 27231230 ) وقدامك 4 أيام عمل ونصل لك . المرة دى جاى من اسوان .

قلت مش ممكن لابد وان أتصل بالمسئولين بالشركة فى القرية الذكية ـ اللى هى مش ذكية خالص ـ  بعت رسالة للاستاذ محمد عزب مسئول الاعلام بالمصرية للاتصالات وقلت له : استاذ محمد مساء الخير أنا اسف اذا ازعجت حضرتك عندى مشكلة فى النت على تليفون رقم (كذا) منذ خمسة ايام وتقدمت بشكوى ومحتاج مساعدة .

الرجل كتر خيره قال لى : حاضر .. عينى .

قلت له : اشكر أفضالك .

يوم 23/5/2016 جانى فنى من المصرية بناء على الشكوى التى قدمتها من قبل لخدمات الدعم الفنى وقال يافندم عايزين نغير الاسبليتر  قلت خد عندك 2 اسبليتر موجودين غير برحتك .. ونفس الحركات والاشتغالات خرج من البيت وبعدين دخل البيت , غيرنا الروتر من لينك سيس الى روتر تى داتا .. وقال خلاص يافندم الخط تمام .

ويادوب وهو على ناصية الشارع .. النت يشتغل شوية ويقطع شوية ..

رسالة تانية للاستاذ محمد عزب قلت فيها : استاذ محمد النت مازال عطلان رغم جانى فنى يوم الجمعة وقام بتغير اسبليتر فقط والنهاردة تقدمت بشكوى تانية برجاء المساعدة ..

وكان رد الاستاذ محمد عزب على الرسالة مفاجأة ان النت هو كمان عندة مشكلة وقال بالنص : وعندى أنا كمان والله يا أستاذ محمود : حاضر .. عينى .

 

النهاردة السبت الموافق 11/6/2016 وأحنا فى شهر كريم اتصلت بالدعم الفنى وأعطانى رقم شكوى أخرى برقم (27828234 ) وقال نفس الكلام ها يفوت علينا بعد أربع أيام عمل .

مفيش مسئول ينقذنا من هذه المشكلة …  نتوجه بالشكوى للسيد وزير الاتصالات وللسادة مسئولى المصرية للاتصالات  وللقائمين على العمل بشركة تى اى داتا نقول لهم ارحمونا يرحمكم الله متخلوش الفشل يبقى عنوانكم .